“Auwt-Prinse Clochards Club”
Carnaval 2017 woor väör de Auwt-Prinse weer ‘n bezunjer jaor. Zoa-es se van dit gemêleerdj gezelsjap moogs verwachte, is m’n al in ‘n vreug stadium (drek nao de sloeting van ‘t carnaval) aan ‘t naodènke äöver de groate optoch van ’t jaor drop. Väöl ideje vlege d’r den äöver de taofel tiedes de intensieve en belaevendje vergaderinge en oeteindelik woor ‘t Jos Heuvelmans, dae net get mieë gewich in de stried wis te goaje en zien idee tót oetveuring zoog kómme.
De Auwt-Prinse zoewe deze kieër es clochards in d’n optoch versjiene. D’r waerdje get feutekes gedeildj op de AP-app en ederein deej zien uterste bès óm d’r get orzjeneels van te make.
Waat m’n echter väöl belangrieker vónj, woor óm de Echter gemeinsjap te betrèkke bie de pas óntstange ‘Auwt-Prinse Clochards Club’, kort eweg ‘APCC’. En dus waerdje d’r appaarte medaaljes gemaaktj die ederein moch oetreike aan hem of häör, die in de ouge van de Auwt-Prinse, get haef mit de Echter carnaval. Nou, det is op ‘t lief gesjreve van de APCC, want waem wiltj d’r noe neet zón sjoan kleinood oetdeile en/of kriege.
Ze bleke al snel erg gewildj en ‘t kosdje den ouch meujte óm ze bewustj oet te deile. Ouch krege de óntvangers van dees medaalje ‘n biebehuuerendje oarkonde mit ‘t verzeuk zich via ‘n spesjaal e-mailadres te melje. Op oos site www.auwt-prinse-ech.nl kèntj g’r zeen waem dees medaalje allemaol haef gekrege.
D’r woor echter nag ‘n extraatje in de vorm van de ‘Groat Oorkonde APCC’! Ónger ‘t optochbal in ‘t Royal Theater, broke de clochards in, in ‘t program en verrasdje Jan Levels, ‘ne man dae al 50 jaor inne optoch mittruk, mit de ieëste ‘Groat Oorkonde APCC’. Hae woor, zoa bleek al snel, hieël erg ingenómme mit deze bliek van waardering.
Kómmendj jaor, zal dees clochardclub weer in de optoch versjiene en ouch den zulle zie de felbegeerdje medaaljes oetdeile. Want waem wiltj noe neet zón medaalje? En natuurlik zal de vraog bie mennigein opborrele: “Waem krigtj dit jaor de ‘Groat Oorkonde APCC’?” Raeje genóg óm oet te kieke nao de Groate Optoch door ’t Aesterriek op zónjig 11 februari en in ‘t bezunjer de groep clochards.
Sjregkedek!
Auwt-Prinse Clochards Club.
Met dank aan onderstaande fotografen hierbij een sfeerimpressie van onze optocht deelname 2017.
- Anita Coenen
- Daan van Buggenum
- Ger Inderhees
- John Rutten
- Koen Hausmans
- Mien Vinken
- Piet Vinken
