Auwt-Prinse on Tour – Ieper 2017
‘t Woor ‘ne sjoane zónnige vriedig in september. Waeke haw ich nao dit weekend oetgekeke. Mien kufferke haw ich al ‘n paar daag klaor staon in de gank. ‘t Woor weer net wie vreuger es ich op sjoalreiske ging, den woor ich de daag van terväöre ouch neet mieë te haoje. Nao ‘n korte nach waerdje ich smörges oppertied wakker van de zenuwe. Vendaag woor het zoa wuud: ‘n gans weekend op paad mit de Auwt-Prinse.
Róndj de klok van nege oer waerdje verzameldj op ‘n geheim locatie. Eigelik woor dit gewuuen bie ‘Van de Ven Vleeswaren’ op ‘t industrieterrein, mer väör ‘t verhaol klinktj ‘n ‘geheim locatie’ get spannendjer. Effe later koom Thei Philippen den aanzitte mit ‘n bös van de Vaos, kóste w’r oos gepek inlaje, ós installere en op nao ‘t Belzje Ieper, want det woor de bestömming väör dees daag!
Natuurlik zeen w’r neet in eine kieër doorgereje nao Ieper, mer zeen weer óngerwaeges ‘n paar kieër gestoptj óm get te aete en natuurlik ouch óm get te drènke. Det is erg belangriek. Gelökkig hawwe w’r ‘n gooj reisleijing die det good in de gate haw en bleef haoje. Gegaete höbbe w’r bie ‘t sjoonste frietkot van gans Belsj. Naodet w’r dao allemaol eine kilo stoofvleis mit frietjes nao bönne hawwe gewirktj, zeen w’r verder gehóbbeldj nao Ieper via ‘t plaetske Bellegem. En ‘t leek waal of het zoa mós zeen, want laot noe in det plaetske toevallig de beerbroewerie van Omer van der Ghinste ligke en weer toevallig ‘ne Auwt-Prins bie ós hawwe dae connecties haef in de beerwaereld! Ómdet w’r allemaol neet te haoje wore, zat Thei de bös mer gaw aan de kantj en höbbe w’r ‘n bezeuk gebrachtj aan die broewerie. W’r waerdje hieël good óntvange en krege ‘n róndjleijing wobie w’r ‘t ganse broeperses van begin tót ènj krege te zeen. Es aafsloeting móste w’r in ‘t preuflokaal alles waat w’r net allein mer hawwe gezeen noe ouch nag ech gaon preuve. Hie höbbe w’r nag tót laat gezaete en toen ‘t leeg oetging in de broewerie zeen weer noadgedwónge mer gegange.
Nao oos bezeuk aan de broewerie zeen weer den ech richting Ieper vertrokke. In de bös op waeg nao oos hotel waerdje door de reisleiing op ‘n erg leuke en ludieke meneer de kamerindeiling bekèndj gemaaktj. Väör väöle ‘n spannendj moment. Aangekómme bie oos hotel installeerdje w’r ós op de kamers, frisdje w’r ós get op en höbbe w’r gezellig get gedrónke mit zien alle. Saoves höbbe w’r gedineerdj en zeen op verkènning gewaes in Ieper (laes: kroegetoch). Ómdet w’r sangeredaags al vreug oet de vaere móste, waerdje beslaote óm neet te laat te gaon slaope óm ouch de res van ‘t weekend nag actief te kènne zeen, want jao w’r blieve ‘Auwt’-Prinse!
Wie w’r lekker loge te slaope, waerdje w’r opèns wakker van ‘ne houp kebaal. Wie ouch nag de däör van de kamer mit väöl geweldj geäöpendj waerdje, zote weer rechop in bèd van de sjrik. Gelökkig woor ‘t geine äöverval, mer woor ‘t ‘ne Auwt-Prins dae letterlik de kamer bönne veel! Óm sjaamte väör dae Auwt-Prins te väörkómme zal ich ‘m neet bie naam numme, det is neet netjes. Ich zèk uch allein det d’r oet Berkelieër kömtj en ‘n zorgboerderie haef, mieë kèn ich uch neet zègke. Nao det w’r dae Auwt-Prins nao zien bèd höbbe beglèdj, kóste w’r lekker wujer gaon slaope.
Sangeredaags smörges zeen w’r oppertied opgestange ómdet ós ‘ne sjoane daag te wachte stóng. Es g’r dènktj det w’r allein mer höbbe gegaete en gedrónke, den höb g’r ‘t mis. Saoterdes haw de reisleijing ‘n fantastisch en hieël indrökwèkkendj program väör ós inein gezatj. Nao det w’r lekker hawwe óntbete in ‘t hotel, zeen w’r mit ós bös en Thei vertrokke nao Poelkapelle en Zonnebeke wo w’r ‘n bezeuk höbbe gebrachtj aan ‘n Duits en ‘n Brits oorlogskèrkhaof. Waat woor det indrökwèkkendj óm te zeen! Dao waerdje w’r allemaol stil van. ‘t Is bizar es se naodènks det d’r hóngerd jaor geleje zoa zwaor gevóchte is gewore en det weer dao noe lepe in vrieheid. Vanoet hie zeen w’r doorgereje nao ‘t centrum van Zonnebeke wo w’r höbbe genaote van ‘ne heerlike lunch. Nao de lunch höbbe w’r ‘n bezeuk gebrach aan ‘t museum Passchendaele en de ‘Church Dugout’, ‘n einmaolige druuegzètting van ‘ne dugout i.v.m. de 1e Waereldoorlog dae zich hie +/- 100 jaor geleje haef aafgespeeldj.
Saoves höbbe w’r gezamelik gegaete in Ieper en höbbe w’r ós richting de ‘Menenpoort’ begaeve. Op de ‘Menenpoort’ staon de name van 54.896 vermisdje seldaote, óngeroffesere en offesere van ‘t ‘Britse Gemenebest’. Vanaaf 1928 weurtj hie edere aovendj óm klokslaag ach oer de ‘Last Post’ gespeeldj. Dit woor ouch weer ‘n hieël indrökwèkkendj moment waat ich neet gaw vergaete zal. Naodet weer de ceremonie bie hawwe gewoondj höbbe w’r nag ‘n rundje langs de lokale horecagelegenhede gemaaktj en zeen w’r get later es daags terväöre gaon slaope.
Sangeredaags smörges wie ich wakker waerdje realiseerdje ich mich det dit alweer de lèste daag woor van ‘n weekend wo ich hieël lang nao oet haw gekeke. Naodet w’r mit zien alle in de ontbijtzaal nao de Formule 1 race hawwe gekeke en Max Verstappen ouch nag haw gewónne (!!!), koos oze daag al neet mieë kepot. W’r höbbe oos kóffers ingepaktj en zeen mit de bös richting heim gereje en höbbe óngerwaeges nag eine stop gemaaktj in Antjwerpe wo w’r op eige gelaegenheid de stad kóste verkènne. Ichzelf haw mich bie ‘n gruupke geveugdj det ónger leijing van gids Ger Bisschops ‘n wanjeling door de stad haef gemaaktj mit es letterlik hoagtepuntj ‘t oetzich vanaaf ‘t daak van ‘t Museum aan de Stroom (MAS). Daonao höbbe w’r es ganse groep nag ‘ne heerlike lunch genuttigdj en toen woor ‘t den toch ech tied óm hoeswaarts te kieëre.
Zoaväöl drökdje es d’r op de haerwaeg in de bös woor, zoa röstig woor ‘t oppe trökwaeg. W’r wore allemaol meug van alle sjoan indrökke en momente die w’r de aafgeloupe daag hawwe opgedaon. Trök aangekómme in Ech, höbbe weer nog effe naovertèldj bie Broen Café de Mert. Saoves loog ich op tied in bèd.
Ich kiek trök op ‘n fantastisch weekend wo-in weer neet allein väöl lol en plezeer mit elkaar höbbe gehadj, mer wo w’r ouch serieuze momente mit elkaar höbbe mitgemaaktj.
’n Spesjaal waord van dank väör de fantastische reisorganisatore Ger Bisschops, Jan Housmans en Sjef Vergoossen en natuurlik ‘oze’ sjefäör Thei Philippen.
Auwt-Prins Gijs I
